‘ಬ್ಯಾಡಗಿ’ ಮೆಣಸಿನಕಾಯಿ ಖಾರ ವರ್ಷದಿಂದ ವರ್ಷಕ್ಕೆ ಇಳಿಮುಖ; ಮೂಲಗುಣ ಹೆಚ್ಚಿಸಲು ಸಂಶೋಧನೆ ಆರಂಭ

ಹೈಲೈಟ್ಸ್‌:

ವಿಶ್ವವಿದ್ಯಾಲಯದ ಆನುವಂಶಿಕ ಮತ್ತು ಸಸ್ಯತಳಿ ಅಭಿವೃದ್ಧಿ ವಿಭಾಗದ ಪ್ರಾಧ್ಯಾಪಕ ಡಾ.ಎಚ್‌.ಡಿ. ಮೋಹನ್‌ ಕುಮಾರ್‌ ಮತ್ತು ಸಂಶೋಧನಾ ವಿದ್ಯಾರ್ಥಿ ಡಾ. ಭಾಗಣ್ಣ ಹರಳಯ್ಯ ಅವರು ಬೆಂಗಳೂರಿನ ಐ ಆ್ಯಂಡ್‌ ಬಿ ಸೀಡ್ಸ್‌ ಪ್ರೈ.ಲಿ. ಕಂಪನಿಯ ಸಹಯೋಗದೊಂದಿಗೆ ಅತೀ ಕಡಿಮೆ ಅವಧಿಯಲ್ಲಿ ಪರಿಪೂರ್ಣ ‘ಹೋಮೋಜೈಗಸ್‌ ಡಬಲ್‌ ಹ್ಯಾಪ್ಲಾಯ್ಡ್‌ ಲೈನ್‌’ಗಳನ್ನು ಅಭಿವೃದ್ಧಿ ಪಡಿಸಲು 2015ರಲ್ಲಿಸಂಶೋಧನೆ ಆರಂಭಿಸಲಾಯಿತು. ಅಂಗಾಂಶ ಕೃಷಿ ತಂತ್ರಜ್ಞಾನ ಪದ್ಧತಿಗಳಲ್ಲಿ ಒಂದಾದ ಇನ್‌ವಿಟ್ರೋ ಆ್ಯಂಥರ್‌ ಕಲ್ಚರ್‌ ವಿಧಾನವನ್ನು ಅಭಿವೃದ್ಧಿ ಪಡಿಸುವಲ್ಲಿ ಯಶಸ್ವಿಯಾಗಿದೆ. ವಿಶೇಷ ಸಂಶೋಧನೆಗೆ ಕೇಂದ್ರ ಸರಕಾರದಿಂದ ಪೇಟೆಂಟ್‌ ಲಭಿಸಿದೆ.

ಸಂಶೋಧನಾರ್ಥಿ ಡಾ.ಭಾಗಣ್ಣ ಹರಳಯ್ಯ ಅವರು ಮೂಲತಃ ವಿಜಯಪುರ ಜಿಲ್ಲೆಇಂಡಿ ತಾಲೂಕು ಪಡನೂರು ಗ್ರಾಮದವರು. ವಿಜಯಪುರ ಕೃಷಿ ಮಹಾವಿದ್ಯಾಲಯದಲ್ಲಿ ಬಿಎಸ್‌ಸಿ ಕೃಷಿಯಲ್ಲಿ ಪದವಿ ಪಡೆದು ಎಂಎಸ್‌ಸಿ ಮತ್ತು ಪಿಎಚ್‌ಡಿಯನ್ನು ಶಿವಮೊಗ್ಗದ ಕೃಷಿ ಮತ್ತು ತೋಟಗಾರಿಕೆ ವಿವಿಯಲ್ಲಿ ಮುಗಿಸಿದ್ದಾರೆ.

ಡಾಲರ್‌ ಗಳಿಕೆ ಬೆಳೆಗೆ ಎದುರಾದ ಸವಾಲು

ಭಾರತದಲ್ಲಿ ಬೆಳೆಯುವ ಸಾಂಬರ್‌ ಪದಾರ್ಥಗಳಿಗೆ ಜಾಗತಿಕ ಮಟ್ಟದಲ್ಲಿ ಎಲ್ಲಿಲ್ಲದ ಬೇಡಿಕೆ ಇದೆ. ಅದರಲ್ಲಿ ಬ್ಯಾಡಗಿ ಮೆಣಸಿನ ಕಾಯಿಗೆ ವಿಶೇಷ ಸ್ಥಾನಮಾನವಿದೆ. ವಿದೇಶಗಳಲ್ಲಿ ಕಡಿಮೆ ಖಾರ ಸೇವನೆ ಮಾಡುವುದರಿಂದ ಬ್ಯಾಡಗಿ ಹೆಚ್ಚು ಬಳಸಲಾಗುತ್ತದೆ.

ಯೂರೋಪ್‌, ಅಮೆರಿಕ, ಮಧ್ಯಪ್ರಾಚ್ಯ ದೇಶಗಳ ಆಹಾರ ಪದ್ಧತಿಯಲ್ಲಿ ಬ್ಯಾಡಗಿ ಹಾಸುಹೊಕ್ಕಾಗಿದೆ. ವಿಶೇಷವಾಗಿ ಆಹಾರ ಉದ್ಯಮ, ಸೌಂದರ್ಯವರ್ಧಕ, ಪಾನೀಯ, ಔಷಧಗಳು, ಜವಳಿ ಉದ್ಯಮಗಳಲ್ಲೂ ಬ್ಯಾಡಗಿಯಲ್ಲಿನ ಬಣ್ಣ ಮತ್ತು ರುಚಿಯನ್ನು ಬಳಸಲಾಗುತ್ತದೆ. ಇದರಲ್ಲಿ ಲಭ್ಯವಿರುವ ನೈಸರ್ಗಿಕ ಬಣ್ಣ ಬಟ್ಟೆ ಮತ್ತು ಕಾಸ್ಮೆಟಿಕ್ಸ್‌ಗಳಿಗೆ ಪೂರಕವಾಗಿದೆ.

ಬ್ಯಾಡಗಿ ಬೆಳೆಯುವ ಪ್ರದೇಶಗಳಲ್ಲಿ ಅಡ್ಡ ಪರಾಗಸ್ಪರ್ಶದಿಂದ (ಕ್ರಾಸ್‌ ಪಾಲಿನೇಶನ್‌) ಅದರ ಆನುವಂಶಿಕತೆ ಕ್ಷೀಣಿಸಿತ್ತು. ಬೇರೆಯ ಪರಾಗರೇಣುಗಳು ಬ್ಯಾಡಗಿಯೊಂದಿಗೆ ಸೇರಿ ಅದರ ಮೂಲಗುಣಧರ್ಮಗಳೇ ಬದಲಾಗಿದ್ದವು. ಇದು ಸಮೀಕ್ಷೆಯಿಂದ ಕಂಡುಬಂದಿತ್ತು.

ಒಂದು ಹೊಸ ತಳಿ ಬಿಡುಗಡೆಗೆ 10-12 ವರ್ಷ ಬೇಕಾಗುತ್ತದೆ. ನವೀನ ಅಂಗಾಂಶ ಕೃಷಿ ಪದ್ಧತಿಗಳಲ್ಲಿಒಂದಾದ ಇನ್‌ವಿಟ್ರೋ ಆ್ಯಂಥರ್‌ ಕಲ್ಚರ್‌ ಮೂಲಕ ಕಡಿಮೆ ಅವಧಿಯಲ್ಲಿಪರಿಪೂರ್ಣ ಹೋಮೋಜೈಗಸ್‌ ಲೈನ್‌ಗಳನ್ನು ಅಭಿವೃದ್ಧಿಪಡಿಸಿದ್ದೇ ಆದಲ್ಲಿ ರೈತಾಪಿ ವರ್ಗಕ್ಕೆ ಅನುಕೂಲವಾಗಲಿದೆ. ಹೆಚ್ಚು ಇಳುವರಿ, ಮೂಲ ಗುಣಲಕ್ಷಣಗಳನ್ನು ಒಳಗೊಂಡ ಬೆಳೆ ಬೆಳೆಯಲು ಅನುಕೂಲ.

ಸಂಶೋಧನೆಯದ್ದೇನು ವಿಶೇಷ?

ಯಾವುದೇ ಬೆಳೆಗಳಲ್ಲಿಆನುವಂಶಿಕ ಸಮಸ್ಯೆಗಳು ಬಂದರೆ, ಸುಧಾರಿತ ತಳಿಯನ್ನು ಬಿಡುಗಡೆ ಮಾಡಬೇಕಾಗುತ್ತದೆ. ಪ್ರಸ್ತುತ ರೂಢಿಯಲ್ಲಿರುವ ವಿಧಾನ ಬಳಸಿ ಸಂಶೋಧನೆಗೆ ಮುಂದಾದರೆ ಬ್ಯಾಡಗಿಯ ಸುಧಾರಿತ ತಳಿ ಬಿಡುಗಡೆಗೆ ಆರೇಳು ವರ್ಷಗಳು ತಗಲುತ್ತವೆ. ಆದರೆ, ಈಗ ಕಂಡುಕೊಂಡಿರುವ ‘ಹೋಮೋಜೈಗಸ್‌ ಡಬಲ್‌ ಹ್ಯಾಪ್ಲಾಯ್ಡ್‌ ಲೈನ್‌’ನಿಂದ ಐದಾರು ತಿಂಗಳುಗಳಲ್ಲಿಸುಧಾರಿತ ತಳಿ ಬಿಡುಗಡೆ ಮಾಡುವ ಅವಕಾಶದ ಹೆಬ್ಬಾಗಿಲನ್ನು ಸಂಶೋಧನೆ ತೆರೆದಿಟ್ಟಿದೆ. ಮುಂದಿನ ದಿನಗಳಲ್ಲಿ ಸಂಶೋಧನೆ ಕೈಗೊಂಡು ಅಭಿವೃದ್ಧಿಪಡಿಸಿದ ಸುಧಾರಿತ ತಳಿಗಳನ್ನು ಬಿಡುಗಡೆಗೊಳಿಸುವ ಅವಕಾಶವೂ ಇದೆ.

ಬ್ಯಾಡಗಿ ಬೆಳೆಯುವ ಪ್ರದೇಶ

ಹಾವೇರಿ ಜಿಲ್ಲೆಯ ಬ್ಯಾಡಗಿ ಎಂಬಲ್ಲಿಅತಿ ಹೆಚ್ಚು ಗುರುತಿಸಿಕೊಂಡಿರುವುದರಿಂದ ಬ್ಯಾಡಗಿ ಮೆಣಸಿನಕಾಯಿ ಎಂದೇ ಪ್ರಖ್ಯಾತಿ ಹೊಂದಿದೆ. ಇದು ಪ್ರಮುಖವಾಗಿ ಉತ್ತರ ಕರ್ನಾಟಕದ ಜಿಲ್ಲೆಗಳಾದ ಧಾರವಾಡ, ಹಾವೇರಿ, ಗದಗ, ಬಾಗಲಕೋಟೆ, ಬೆಳಗಾವಿ ಹಾಗೂ ಚಿತ್ರದುರ್ಗ, ದಾವಣಗೆರೆ, ಚಿಕ್ಕಮಗಳೂರಿನ ಕೆಲವು ಭಾಗಗಳಲ್ಲಿಬೆಳೆಯಲಾಗುತ್ತದೆ. ಇತ್ತೀಚೆಗೆ ರಾಯಚೂರು ಮತ್ತು ಬಳ್ಳಾರಿ ಜಿಲ್ಲೆಗಳಲ್ಲಿ ನೀರಾವರಿಯಲ್ಲಿಯೂ ಸಹ ಬೆಳೆಯಲಾಗುತ್ತಿದೆ.

‘ಪೇಟೆಂಟ್ ಸಿಕ್ಕಿದ್ದಕ್ಕೆ ಖುಷಿಯಾಗಿದೆ’

ಪ್ರಾಧ್ಯಾಪಕ ಡಾ.ಎಚ್‌.ಡಿ. ಮೋಹನ್‌ ಕುಮಾರ್‌ ಅವರ ಮಾರ್ಗದರ್ಶನದಲ್ಲಿಕೈಗೊಂಡಿರುವ ಸಂಶೋಧನೆಗೆ ಪೇಟೆಂಟ್‌ ಸಿಕ್ಕಿದ್ದಕ್ಕೆ ಖುಷಿಯಾಗಿದೆ. ಇದು ಬ್ಯಾಡಗಿ ಮೆಣಸಿನಕಾಯಿ ಮೌಲ್ಯವರ್ಧನೆ ಸೇರಿದಂತೆ ಜಾಗತಿಕ ಮಾರುಕಟ್ಟೆಯಲ್ಲಿಇನ್ನಷ್ಟು ಶಕ್ತಿ ತರುವಲ್ಲಿಸಹಕಾರಿಯಾಗುವ ಆಶಾವಾದ ಇದೆ.