ಹೈಲೈಟ್ಸ್‌:
- ಉದ್ಯೋಗ ನೇಮಕಾತಿಗಳು ಈ ವರ್ಷ ಶೇ. 8.3ರಷ್ಟು ಹೆಚ್ಚಾಗಬಹುದು ಎಂದ ಫೌಂಡ್‌ಇಟ್‌ ಜಾಬ್‌ ಪೋರ್ಟಲ್‌ ಸಮೀಕ್ಷೆ
- ಕಳೆದ ವರ್ಷ ಕಡಿಮೆಯಾಗಿದ್ದ ನೇಮಕಾತಿ ಪ್ರಮಾಣ ಈ ವರ್ಷ ಚೇತರಿಕೆ ಕಾಣುವ ಲಕ್ಷಣಗಳಿವೆ ಎಂದ ಸಮೀಕ್ಷೆ
- 2024ರಲ್ಲಿ ಬೆಂಗಳೂರಿನಲ್ಲಿ ನೇಮಕಾತಿ ಪ್ರಮಾಣವು ಶೇ. 11ರಷ್ಟು ಹೆಚ್ಚಳವಾಗಲಿದೆ ಎಂದು ಅಂದಾಜಿಸಿದೆ ಸಮೀಕ್ಷೆ
ಹೊಸದಿಲ್ಲಿ: ಉದ್ಯೋಗ ನೇಮಕಾತಿಗಳು ಈ ವರ್ಷ ಶೇ. 8.3ರಷ್ಟು ಹೆಚ್ಚಾಗಬಹುದು ಎಂದು ಫೌಂಡ್‌ಇಟ್‌ (ಮೊದಲು ಮಾನ್‌ಸ್ಟಾರ್‌) ಜಾಬ್‌ ಪೋರ್ಟಲ್‌ ಸಮೀಕ್ಷೆ ಹೇಳಿದೆ. ಕಳೆದ ವರ್ಷ ನೇಮಕಾತಿ ಪ್ರಮಾಣ ಕಡಿಮೆಯಾಗಿತ್ತು. ಈ ವರ್ಷ ಚೇತರಿಕೆಯ ಲಕ್ಷಣಗಳಿವೆ ಎಂದು ಸಮೀಕ್ಷೆ ತಿಳಿಸಿದೆ.
ಫೌಂಡ್‌ಇಟ್‌ನ ವಾರ್ಷಿಕ ಟ್ರೆಂಡ್ಸ್‌ ವರದಿಯಲ್ಲಿ ಕೃತಕ ಬುದ್ಧಿಮತ್ತೆ (ಎಐ), ಮೆಷಿನ್‌ ಲರ್ನಿಂಗ್‌, ಡೇಟಾ ಸೈನ್ಸ್‌, ಸೈಬರ್‌ ಸೆಕ್ಯೂರಿಟಿ ವೃತ್ತಿಪರರಿಗೆ ಉದ್ಯೋಗ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚಲಿದೆ ಎಂದು ಹೇಳಲಾಗಿದೆ. 2024ರಲ್ಲಿ ಬೆಂಗಳೂರಿನಲ್ಲಿ ನೇಮಕಾತಿ ಪ್ರಮಾಣವು ಶೇ. 11ರಷ್ಟು ಹೆಚ್ಚಳವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.
ಉತ್ಪಾದನೆ, ಬಿಎಫ್‌ಎಸ್‌ಐ (ಬ್ಯಾಂಕಿಂಗ್‌, ಫೈನಾನ್ಶಿಯಲ್‌ ಸರ್ವೀಸಸ್‌ ಆ್ಯಂಡ್‌ ಇನ್ಷೂರೆನ್ಸ್‌), ಆಟೋಮೋಟಿವ್‌, ಚಿಲ್ಲರೆ ವ್ಯಾಪಾರ ಮತ್ತು ಪ್ರಯಾಣ ಹಾಗೂ ಪ್ರವಾಸೋದ್ಯಮ ವಲಯಗಳಲ್ಲಿ ಹೆಚ್ಚಿನ ನೇಮಕಾತಿಯನ್ನು ನಿರೀಕ್ಷಿಸಲಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.
2023ರಲ್ಲಿ ಕೆಲವು ವಲಯಗಳು ಗಮನಾರ್ಹವಾದ ಸ್ಥಿತಿಸ್ಥಾಪಕತ್ವ ಮತ್ತು ಬೆಳವಣಿಗೆಯನ್ನು ಪ್ರದರ್ಶಿಸಿದವು. ಡಿಸೆಂಬರ್‌ನಲ್ಲಿ ಉದ್ಯೋಗ ಮಾರುಕಟ್ಟೆ ಚೇತರಿಕೆಯ ಲಕ್ಷಣಗಳನ್ನು ತೋರಿಸುವುದರೊಂದಿಗೆ ಈ ವರ್ಷದ ಒಟ್ಟಾರೆ ನೇಮಕಾತಿ, ಶೇ. 8.3ರಷ್ಟು ಬೆಳೆಯುವ ನಿರೀಕ್ಷೆಯಿದೆ ಎಂದು ವರದಿಯು ಬೆಳಕು ಚೆಲ್ಲಿದೆ.
ಕಳೆದ ವರ್ಷ (2023) ಉದ್ಯೋಗ ನೇಮಕಾತಿ 5% ಇಳಿಕೆ
ಡಿಸೆಂಬರ್‌ನಲ್ಲಿ ನೇಮಕಾತಿಯಲ್ಲಿ ಶೇ. 2ರಷ್ಟು ಬೆಳವಣಿಗೆ ಕಂಡುಬಂದಿದೆ. ಇದರ ಹೊರತಾಗಿಯೂ 2022ಕ್ಕೆ ಹೋಲಿಸಿದರೆ 2023ರಲ್ಲಿ ನೇಮಕಾತಿ ಚಟುವಟಿಕೆಯು ಶೇ. 5ರಷ್ಟು ಕಡಿಮೆಯಾಗಿದೆ. ಇದು ಉದ್ಯೋಗ ಮಾರುಕಟ್ಟೆಯಲ್ಲಿ ನಿಧಾನಗತಿಯನ್ನು ಸೂಚಿಸುತ್ತದೆ. ಆದಾಗ್ಯೂ, 2023ರ ಕೊನೆಯ ತಿಂಗಳಲ್ಲಿ ಸೂಚ್ಯಂಕವು ಶೇ. 2ರ ಹೆಚ್ಚಳವನ್ನು ಪ್ರದರ್ಶಿಸಿದೆ.
“ನೇಮಕಾತಿ ದರಗಳು ಸ್ಥಿರಗೊಂಡಿದ್ದವು. ಆದರೆ ಆರ್ಥಿಕತೆಯು 2023ರ ಅಂತ್ಯದ ವೇಳೆಗೆ ಚೇತರಿಕೆಯನ್ನು ದಾಖಲಿಸಿದೆ. ಉದ್ಯೋಗ ಮಾರುಕಟ್ಟೆಯು ಚೇತರಿಕೆಯ ಒಂದು ಹಂತವನ್ನು ಪ್ರವೇಶಿಸಿದೆ,” ಎಂದು ವರದಿಯಲ್ಲಿ ವಿವರಿಸಲಾಗಿದೆ.
ಕಳೆದ ವರ್ಷದ ಟ್ರೆಂಡ್‌ ಏನು?
* 2023ರಲ್ಲಿ ಸಾಗರ ಮತ್ತು ಹಡಗು ಉದ್ಯಮದಲ್ಲಿ ಉದ್ಯೋಗ ನೇಮಕಗಳು ಶೇ. 28ರಷ್ಟು ಹೆಚ್ಚಳ
* ಚಿಲ್ಲರೆ ವ್ಯಾಪಾರ ಹಾಗೂ ಪ್ರಯಾಣ ಮತ್ತು ಪ್ರವಾಸೋದ್ಯಮ ಕ್ಷೇತ್ರಗಳಲ್ಲಿ ನೇಮಕಾತಿ ಶೇ. 25ರಷ್ಟು ಏರಿಕೆ
* ಜಾಹೀರಾತು, ಮಾರುಕಟ್ಟೆ ಸಂಶೋಧನೆ ಮತ್ತು ಸಾರ್ವಜನಿಕ ಸಂಪರ್ಕ ವಲಯದಲ್ಲಿ ಉದ್ಯೋಗ ನೇಮಕಾತಿ ಶೇ. 18ರಷ್ಟು ಹೆಚ್ಚಳ
+ There are no comments
Add yours