ಮೊಹಮ್ಮದ್ ಶಮಿ ಅಂತಹ ಬೌಲರ್ ಅನ್ನು ಸೃಷ್ಟಿ ಮಾಡಲು ಸಾಧ್ಯವಿಲ್ಲ- ಎಂದ ಪಾರಸ್ ಮಾಂಬ್ರೆ!

• ಮೊಹಮ್ಮದ್ ಶಮಿಯಂತಹ ಬೌಲರ್ ಅನ್ನು ಯಾವುದೇ ಕೋಚ್ ಗಳಿಂದ ಸೃಷ್ಟಿಸಲು ಸಾಧ್ಯವಿಲ್ಲ: ಪಾರಸ್ ಮಾಂಬ್ರೆ
• 2023ರ ಏಕದಿನ ಕ್ರಿಕೆಟ್‌ ವಿಶ್ವಕಪ್ ಟೂರ್ನಿಯಲ್ಲಿ 24 ವಿಕೆಟ್‌ಗಳನ್ನು ಪಡೆದಿದ್ದ ಅನುಭವಿ ವೇಗದ ಬೌಲರ್‌.
• ಟೀಮ್ ಇಂಡಿಯಾದ ಯಾರ್ಕರ್ ಸ್ಪೆಷಲಿಸ್ಟ್ ಜಸ್ಪ್ರೀತ್ ಬುಮ್ರಾ ಬೌಲಿಂಗ್ ಅನ್ನು ಕೊಂಡಾಡಿರುವ ಮಾಂಬ್ರೆ.

ಬೆಂಗಳೂರು: ಮೈದಾನದಲ್ಲಿ ಸದಾ ನಿಯಮಿತ ವೇಗದೊಂದಿಗೆ ಉತ್ತಮ ಸ್ಥಳದಲ್ಲಿ ಚೆಂಡನ್ನು ಬೌಲ್ ಮಾಡಿ ವಿಕೆಟ್ ಪಡೆಯುವ ಕಲೆ ಹೊಂದಿರುವ ಮೊಹಮ್ಮದ್ ಶಮಿಗೆ ಸರಿಸಾಟಿಯಾದ ಬೌಲರ್ ಗಳೇ ಇಲ್ಲ ಎಂದು ಟೀಮ್ ಇಂಡಿಯಾದ ಬೌಲಿಂಗ್ ಕೋಚ್ ಪಾರಸ್ ಮಾಂಬ್ರೆ ಮುಕ್ತ ಕಂಠದಿಂದ ಗುಣಗಾಣ ಮಾಡಿದ್ದಾರೆ.

ಮೊಹಮ್ಮದ್ ಶಮಿ ಅವರು ಏಕದಿನ ಹಾಗೂ ಟೆಸ್ಟ್ ಸರಣಿಗಳಲ್ಲಿ ಟೀಮ್ ಇಂಡಿಯಾದ ಪ್ರೈಮ್ ಬೌಲರ್ ಆಗಿದ್ದು, 2023ರ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಆಡಿದ 7 ಪಂದ್ಯಗಳಿಂದಲೇ 24 ವಿಕೆಟ್ ಪಡೆದು ಗಮನ ಸೆಳೆದಿದ್ದರು. ಅದರಲ್ಲೂ ಸೆಮಿಫೈನಲ್ ಪಂದ್ಯದಲ್ಲಿ ನ್ಯೂಜಿಲೆಂಡ್ ವಿರುದ್ಧ 7 ವಿಕೆಟ್ ಪಡೆದು ವಿಶ್ವಕಪ್ ಟೂರ್ನಿ ಇತಿಹಾಸದಲ್ಲಿ ಅತಿ ವೇಗವಾಗಿ 50 ವಿಕೆಟ್ ಸಾಧನೆ ಮಾಡಿದ ಬೌಲರ್ ಆಗಿ ಹೊರಹೊಮ್ಮಿದ್ದರು.

ಶಮಿ ಅಂತಹ ಬೌಲರ್ ಗಳನ್ನು ಸೃಷ್ಟಿಸಲು ಸಾಧ್ಯವಿಲ್ಲ: ಪಾರಸ್ ಮಾಂಬ್ರೆ

ಪಿಟಿಐ ಜೊತೆ ನಡೆಸಿದ ಸಂವಾದದಲ್ಲಿ ಮಾತನಾಡಿರುವ ಟೀಮ್ ಇಂಡಿಯಾದ ಬೌಲಿಂಗ್ ಕೋಚ್ ಪಾರಸ್ ಮಾಂಬ್ರೆ, ತಂಡದ ಅನುಭವಿ ಬೌಲರ್ ಗಳಾದ ಮೊಹಮ್ಮದ್ ಶಮಿ ಹಾಗೂ ಜಸ್ಪ್ರೀತ್ ಬುಮ್ರಾ ಅವರ ಬೌಲಿಂಗ್ ಅನ್ನು ಗುಣಗಾಣ ಮಾಡಿದ್ದಾರೆ.

“ಯಾವುದೇ ತರಬೇತುದಾರರು ಮೊಹಮ್ಮದ್ ಶಮಿ ಅಂತಹ ಬೌಲರ್ ಅನ್ನು ಸೃಷ್ಟಿಸಬಹುದು ಎಂದು ನಾನು ಹೇಳಿದರೆ, ನಾನು ಸುಳ್ಳು ಹೇಳುತ್ತಿದ್ದೇನೆ ಎಂದರ್ಥ. ಒಬ್ಬ ಬೌಲರ್ ಪ್ರತಿ ಬಾರಿ ವೇಗದ ಮೇಲೆ ಹಿಡಿತ ಸಾಧಿಸಿ ಚೆಂಡನ್ನು ಎಸೆಯಲು ಸಾಧ್ಯವಾದರೆ, ಪ್ರಪಂಚದ ಪ್ರತಿಯೊಬ್ಬ ಬೌಲರ್ ಮೊಹಮ್ಮದ್ ಶಮಿ ಆಗಿಬಿಡುತ್ತಾರೆ,” ಎಂದು ಟೀಮ್ ಇಂಡಿಯಾ ಬೌಲಿಂಗ್ ಕೋಚ್ ಹೇಳಿದ್ದಾರೆ.

ಶಮಿ ಕಠಿಣ ಶ್ರಮ ಪಟ್ಟಿದ್ದಾರೆ

“ಶಮಿ ಅವರು ತಮ್ಮ ಕಠಿಣ ಪರಿಶ್ರಮದಿಂದ ಸಂಪಾದಿಸಿರುವ ಕೌಶಲ್ಯವಾಗಿದೆ. ವರ್ಷದಿಂದ ವರ್ಷಕ್ಕೆ ಕಠಿಣ ಶ್ರಮಪಟ್ಟು ಅತ್ಯುತ್ತಮ ಬೌಲರ್ ಆಗಿ ತಮ್ಮನ್ನು ರೂಪಿಸಿಕೊಂಡಿದ್ದಾರೆ. ಚೆಂಡನ್ನು ಸೀಮ್ ಕೆಳಗೆ ಬೌಲ್ ಮಾಡುವುದು ಮತ್ತು ಸರಿಯಾದ ಹೊಂದಾಣಿಕೆಯೊಂದಿಗೆ ಯಾವುದೇ ದಿಕ್ಕಿನಲ್ಲಿ ಚೆಂಡನ್ನು ತಿರುಗಿಸುವ ಅಪರೂಪದ ಕೌಶಲ್ಯವನ್ನು ಅವರು ರೂಢಿಸಿಕೊಂಡಿದ್ದಾರೆ. ಎಷ್ಟೋ ಬೌಲರ್ ಗಳು ಚೆಂಡನ್ನು ವೇಗವಾಗಿ ಎಸೆಯುತ್ತಾರೆ. ಆದರೆ ಪಿಚ್ ನಲ್ಲಿ ಬಿದ್ದ ಬಳಿಕ ಅದು ನೇರವಾಗಿ ಹೋಗುತ್ತದೆ,” ಎಂದು ಮಾಂಬ್ರೆ ಹೇಳಿದ್ದಾರೆ.

ಬುಮ್ರಾರನ್ನು ಕೊಂಡಾಡಿದ ಪಾರಸ್ ಮಾಂಬ್ರೆ

ಮೊಹಮ್ಮದ್ ಶಮಿ ಹಾಗೂ ಜಸ್ಪ್ರೀತ್ ಬುಮ್ರಾ ಅವರು ತಮ್ಮ ಬೌಲಿಂಗ್ ಸಾಮರ್ಥ್ಯದಿಂದ ವಿಶ್ವಶ್ರೇಷ್ಠ ಬ್ಯಾಟರ್ ಗಳನ್ನು ಕಟ್ಟಿಹಾಕಬಲ್ಲರು ಎಂದು ಪಾರಸ್ ಮಾಂಬ್ರೆ ಹೇಳಿದ್ದಾರೆ.

“ಬುಮ್ರಾ ತನ್ನ ವಿಭಿನ್ನ ಶೈಲಿ ಬೌಲಿಂಗ್ ನಿಂದಲೇ ಚೆಂಡನ್ನು ಒಳಗೆ ಮತ್ತು ಹೊರಗೆ ತೆಗೆದುಕೊಳ್ಳುತ್ತಾರೆ. ಇದೊಂದು ಅಪರೂಪದ ಕಲೆಯಾಗಿದ್ದು, ಅದನ್ನು ಪರಿಪೂರ್ಣಗೊಳಿಸಲು ಸಾಕಷ್ಟು ಶ್ರಮ ಮತ್ತು ಸಮರ್ಪಣೆ ಬೇಕಾಗುತ್ತದೆ. ನನ್ನ ಪ್ರಕಾರ ಟೆಸ್ಟ್ ಕ್ರಿಕೆಟ್ ನಲ್ಲಿ ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಶಮಿ ಹಾಗೂ ಇಶಾಂತ್ ಶರ್ಮಾ ಈ ರೀತಿಯ ಕಲೆಯನ್ನು ಕರಗತ ಮಾಡಿಕೊಂಡಿದ್ದಾರೆ. ನನ್ನ ಕನಸಿನಲ್ಲೂ ಅಂತಹ ಬೌಲಿಂಗ್ ಪ್ರದರ್ಶನವನ್ನು ನಿರೀಕ್ಷಿಸಿರಲಿಲ್ಲ,” ಎಂದು ಪಾರಸ್ ಮಾಂಬ್ರೆ ಹೇಳಿದ್ದಾರೆ.

ಬೌಲರ್ ಗಳ ಸೇವೆ ಶ್ಲಾಘನೀಯ

“ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಶ್ರೀಲಂಕಾ ತಂಡವನ್ನು 50 ರನ್ ಗಳಿಗೆ ಕಟ್ಟಿಹಾಕಿದ್ದು, ಮತ್ತು ಇದೇ ಪ್ರದರ್ಶನವನ್ನು ಮುಂದುವರಿಸಿ ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯದಲ್ಲಿ 320 ರನ್ ಗಳಿಸಿ ನಂತರ ಎದುರಾಳಿ ತಂಡವನ್ನು 80 ರನ್ ಗಳಿಗೆ ನಿಯಂತ್ರಿಸಿದ್ದು ಅತಿವಾಸ್ತವಿಕವಾಗಿದೆ. ನಿಸ್ಸಂಶಯವಾಗಿ ನಾವು ನಮ್ಮ ಬೌಲರ್ ಗಳಿಂದ ಈ ರೀತಿಯ ಪ್ರದರ್ಶನವನ್ನೇ ಎದುರು ನೋಡುತ್ತಿರುತ್ತೇವೆ. ಆದರೆ ವಿಶ್ವಕಪ್ ಟೂರ್ನಿಯಂತಹ ಮಹತ್ತರ ಪಂದ್ಯಗಳಲ್ಲಿ ಇಂತಹ ಬೌಲಿಂಗ್ ಪ್ರದರ್ಶನ ಹೊಮ್ಮಿಬರುವುದು ನಿಜಕ್ಕೂ ಶ್ಲಾಘನೀಯವಾಗಿದೆ,” ಎಂದು ಮಾಂಬ್ರೆ ಹೇಳಿದ್ದಾರೆ.