ಹಮಾಸ್ ಉಗ್ರರೆಂದು ಭಾವಿಸಿ ತನ್ನ ಪ್ರಜೆಗಳನ್ನೇ ಕೊಂದ ಇಸ್ರೇಲ್‌ ಸೇನೆ!

ಹೈಲೈಟ್ಸ್‌:

ಹಮಾಸ್ ವಶದಿಂದ ಹೊರಬಂದಿದ್ದ ಮೂವರು ಒತ್ತೆಯಾಳುಗಳು ಗುಂಡೇಟಿಗೆ ಬಲಿ
ಗಾಜಾಪಟ್ಟಿಯ ಜಾಬಾಲಿಯಾ ಮೇಲೆ ಇಸ್ರೇಲ್‌ ಪಡೆಗಳಿಂದ ವಾಯುದಾಳಿ
ಅಮೆರಿಕ ಎಚ್ಚರಿಕೆ ನಡುವೆಯೂ ‘ಸದ್ಯಕ್ಕೆ ದಾಳಿ ನಿಲ್ಲದು’ ಎಂದ ಪ್ರಧಾನಿ ನೆತನ್ಯಾಹು

ಟೆಲ್ ಅವಿವ್: ಹಮಾಸ್‌ ಉಗ್ರರ ಜತೆಗಿನ ಸಂಘರ್ಷದ ವೇಳೆ ಇಸ್ರೇಲ್‌ ಸೇನೆಯು ತನ್ನ ದೇಶದ ಮೂವರು ಒತ್ತೆಯಾಳುಗಳನ್ನು ಕೊಂದು ಪ್ರಮಾದ ಎಸೆದಿದೆ. ಹಮಾಸ್‌ ಉಗ್ರರ ವಶದಲ್ಲಿದ್ದ ಅಪಹೃತ ಒತ್ತೆಯಾಳುಗಳು ಉಗ್ರರಿರಬಹುದು ಎಂದು ತಪ್ಪಾಗಿ ಭಾವಿಸಿ ಸೇನೆಯು ಅವರನ್ನು ಕೊಂದಿದೆ.

”ಇದು ತಿಳಿಯದೆ ನಡೆದ ದೊಡ್ಡ ಪ್ರಮಾದ. ನಮಗೆ ನೋವಿನ ಸಂಗತಿಯಾಗಿದೆ,” ಎಂದು ಇಸ್ರೇಲ್‌ ರಕ್ಷಣಾ ಪಡೆ ವಕ್ತಾರ ಡೇನಿಯಲ್‌ ಹ್ಯಾಗರಿ ವಿಷಾದ ವ್ಯಕ್ತಪಡಿಸಿದ್ದಾರೆ. ಘಟನೆಯನ್ನು ಖಂಡಿಸಿ, ಇಸ್ರೇಲ್‌ ಪ್ರಜೆಗಳು ಟೆಲ್‌ ಅವೀವ್‌ನ ಕಿರಿಯಾ ಸೇನಾ ನೆಲೆ ಬಳಿ ಪ್ರತಿಭಟನೆ ನಡೆಸಿದ್ದಾರೆ.

ಈ ಮಧ್ಯೆ, ಸೇನೆಯ ಅಚಾತುರ್ಯಕ್ಕೆ ವಿಷಾದ ವ್ಯಕ್ತಪಡಿಸಿರುವ ಪ್ರಧಾನಿ ನೆತನ್ಯಾಹು, ”ಯುದ್ಧದ ಸಂದರ್ಭದಲ್ಲಿ ಇಂಥ ಸಾವುಗಳು ನಡೆಯುವುದು ಸಾಮಾನ್ಯ,” ಎಂದಿದ್ದಾರೆ. ಸಾವಿಗೀಡಾದ ಮೂವರು ಇಸ್ರೇಲಿ ಒತ್ತೆಯಾಳುಗಳನ್ನು ಯೋತಮ್‌ ಹೈಮ್, ಸರ್ಮ ತಲಲ್ಕಾ ಮತ್ತು ಅಲೋನ್‌ ಶಮ್ರಿಜ್‌ ಎಂದು ಗುರುತಿಸಲಾಗಿದೆ. ಈ ಮೂವರೂ ಅಕ್ಟೋಬರ್‌ 7ರಿಂದ ಹಮಾಸ್‌ ಉಗ್ರರ ವಶದಲ್ಲಿದ್ದರು.

ಈ ಮೂವರೂ ಅಂಗಿ ಧರಿಸಿರಲಿಲ್ಲ. ಅವರಲ್ಲಿ ಒಬ್ಬರು ಶಾಂತಿ ಧ್ಯೋತಕವಾಗಿ ಬಿಳಿ ಬಟ್ಟೆಯನ್ನು ಬಾವುಟದಂತೆ ಹಿಡಿದುಕೊಂಡಿದ್ದರು. ಇದನ್ನು ಗಮನಿಸಿದ ಬಳಿಕವೂ ಇಸ್ರೇಲ್ ಪಡೆಗಳು ಗುಂಡು ಹಾರಿಸಿವೆ. “ಉಗ್ರರು” ಎಂದು ಕೂಗಿದ ಇಸ್ರೇಲ್ ಸೈನಿಕನೊಬ್ಬ, ಗುಂಡು ಹಾರಿಸಿದ್ದ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

15 ಪ್ಯಾಲೆಸ್ತೀನಿಯರ ಹತ್ಯೆ

ಹಮಾಸ್‌ ಉಗ್ರರ ನಿರ್ನಾಮದ ಸಂಕಲ್ಪ ತೊಟ್ಟಿರುವ ಇಸ್ರೇಲ್‌ ಪಡೆಗಳು, ಅಮೆರಿಕ ಎಚ್ಚರಿಕೆಯ ನಡುವೆಯೂ ಗಾಜಾಪಟ್ಟಿಯ ಪ್ರದೇಶಗಳ ಮೇಲೆ ದಾಳಿ ಮುಂದುವರಿಸಿದೆ. ಇಸ್ರೇಲ್‌ ಸೇನೆಯು ಶನಿವಾರ ಜಾಬಾಲಿಯಾ ಪ್ರದೇಶದ ಮೇಲೆ ವಾಯುದಾಳಿ ನಡೆಸಿದ್ದು, ಅದರಲ್ಲಿ 15ಕ್ಕೂ ಹೆಚ್ಚು ಪ್ಯಾಲೆಸ್ತೀನಿಯರು ಸಾವಿಗೀಡಾಗಿದ್ದಾರೆಂದು ಪ್ಯಾಲೆಸ್ತೀನಿ ಮಾಧ್ಯಮಗಳು ವರದಿ ಮಾಡಿವೆ.

ಮೂರನೇ ತಿಂಗಳಿಗೆ ಕಾಲಿಟ್ಟಿರುವ ಯುದ್ಧ ಕೊನೆಗೊಳಿಸುವಂತೆ ಅಮೆರಿಕ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಜೇಕ್‌ ಸುಲ್ಲಿವಾನ್‌ ಅವರು ಶುಕ್ರವಾರ ಇಸ್ರೇಲ್‌ ನಾಯಕರನ್ನು ಭೇಟಿಯಾಗಿ ಒತ್ತಡ ಹೇರಿದ್ದರೂ ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಸರಕಾರ ತಲೆಕೆಡಿಸಿಕೊಂಡಿಲ್ಲ. ಕದನ ವಿರಾಮ ಘೋಷಿಸುವಂತೆ ಮತ್ತು ಮಾನವೀಯ ಪರಿಹಾರಕ್ಕೆ ಹಾದಿ ಮಾಡಿಕೊಡುವಂತೆ ಇಸ್ರೇಲ್‌ ಮೇಲೆ ಅಂತಾರಾಷ್ಟ್ರೀಯ ಸಮುದಾಯ ಒತ್ತಡ ಹಾಕುತ್ತಿದ್ದರೂ, ಅದು ಗಾಜಾ ಮೇಲೆ ಸಮರ ಮುಂದುವರಿಸಿದೆ.

ಜಾಬಾಲಿಯಾದ ಓಲ್ಡ್‌ ಗಾಜಾ ಸ್ಟ್ರೀಟ್‌ನ ಎರಡು ಮನೆಗಳಲ್ಲಿ ಉಗ್ರರು ಅಡಗಿದ್ದಾರೆಂಬ ಮಾಹಿತಿತಯ ಜಾಡು ಹಿಡಿದು ಇಸ್ರೇಲ್‌ ಸೇನಾ ಪಡೆ (ಐಡಿಎಫ್‌) ವೈಮಾನಿಕ ದಾಳಿ ನಡೆಸಿದೆ. ಕಟ್ಟಡಗಳ ಅವಶೇಷಗಳಡಿ ಸಿಲುಕಿ 15ಕ್ಕೂ ಹೆಚ್ಚು ನಾಗರಿಕರು ಮೃತಪಟ್ಟಿದ್ದಾರೆಂದು ಪ್ಯಾಲೆಸ್ತೀನ್‌ ಏಜೆನ್ಸಿಗಳು ತಿಳಿಸಿವೆ.

ಇದೇ ವೇಳೆ ಗಾಜಾ ಪಟ್ಟಣದ ಎರಡು ಶಾಲೆಗಳಿಗೆ ನುಗ್ಗಿದ ಇಸ್ರೇಲ್‌ ಸೇನೆಯು ಅಲ್ಲಿದ್ದ ಉಗ್ರರನ್ನು ಸದೆಬಡಿದಿದೆ. ಅಲ್ಲದೇ ಖಾನ್‌ ಯೂನಿಸ್‌ ಪ್ರದೇಶದ ಅಪಾರ್ಟ್‌ಮೆಂಟ್‌ವೊಂದರಲ್ಲಿ ಶೋಧ ನಡೆಸಿ, ಉಗ್ರರು ಅಡಗಿಸಿಟ್ಟಿದ್ದ ಭಾರಿ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡಿದೆ.