ಎಂಎಸ್ ಧೋನಿ ಕ್ಯಾಪ್ಟನ್ಸಿ ದಾಖಲೆ ಮುರಿದ ಕೆಎಲ್ ರಾಹುಲ್!

• ದಕ್ಷಿಣ ಆಫ್ರಿಕಾ ವಿರುದ್ಧ 8 ವಿಕೆಟ್ ಗಳ ಗೆಲುವು ದಕ್ಕಿಸಿಕೊಂಡ ಟೀಮ್ ಇಂಡಿಯಾ.
• ತಮ್ಮ ಕ್ಯಾಪ್ಟನ್ಸಿಯಲ್ಲಿ ಸತತ 10 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ ಕೆ.ಎಲ್.ರಾಹುಲ್.
• ಕೂಲ್ ಕ್ಯಾಪ್ಟನ್ ಎಂ.ಎಸ್.ಧೋನಿ ಹೆಸರಿನಲ್ಲಿದ್ದ ಕ್ಯಾಪ್ಟನ್ಸಿ ದಾಖಲೆ ಮುರಿದ ಟೀಮ್ ಇಂಡಿಯಾದ ಹಂಗಾಮಿ ನಾಯಕ.

ಜೋಹಾನ್ಸ್‌ಬರ್ಗ್: ಟೀಮ್ ಇಂಡಿಯಾದ ಹಂಗಾಮಿ ನಾಯಕ ಹಾಗೂ ವಿಕೆಟ್ ಕೀಪರ್ ಕೆ.ಎಲ್.ರಾಹುಲ್ ದಕ್ಷಿಣ ಆಫ್ರಿಕಾ ವಿರುದ್ಧ ಇಲ್ಲಿನ ವಾಂಡರರ್ಸ್ ಕ್ರೀಡಾಂಗಣದಲ್ಲಿ ಡಿಸೆಂಬರ್ 17 (ಭಾನುವಾರ) ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ತಮ್ಮ ನಾಯಕತ್ವದಲ್ಲಿ ಭಾರತ ತಂಡಕ್ಕೆ 8 ವಿಕೆಟ್ ಗಳ ಗೆಲುವು ದಕ್ಕಿಸಿಕೊಡುವ ಮೂಲಕ ಕೂಲ್ ಕ್ಯಾಪ್ಟನ್ ಮಹೇಂದ್ರ ಸಿಂಗ್ ಧೋನಿ ಹೆಸರಿನಲ್ಲಿದ್ದ ಕ್ಯಾಪ್ಟನ್ಸಿ ದಾಖಲೆಯೊಂದನ್ನು ಮುರಿದು ರೋಹಿತ್ ಶರ್ಮಾ ಹಾಗೂ ವಿರಾಟ್ ಕೊಹ್ಲಿ ಇರುವ ಎಲೈಟ್ ಗುಂಪಿಗೆ ಸೇರ್ಪಡೆಗೊಂಡಿದ್ದಾರೆ.

ಕನ್ನಡಿಗ ಕೆ.ಎಲ್.ರಾಹುಲ್ ದಕ್ಷಿಣ ಆಫ್ರಿಕಾ ವಿರುದ್ಧ 8 ವಿಕೆಟ್ ಗೆಲುವು ಸಾಧಿಸಿ ಅಂತಾರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ತಮ್ಮ ನಾಯಕತ್ವದಲ್ಲಿ ಸತತ 10 ಪಂದ್ಯಗಳಲ್ಲಿ ಗೆಲುವಿನ ನಗೆ ಬೀರಿದ್ದಾರೆ. ಇದಕ್ಕೂ ಮುನ್ನ ಹಿಟ್ ಮ್ಯಾನ್ ರೋಹಿತ್ ಶರ್ಮಾ ಹಾಗೂ ವಿರಾಟ್ ಕೊಹ್ಲಿ ತಮ್ಮ ನಾಯಕತ್ವದಲ್ಲಿ ಸತತ 10 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ ಟೀಮ್ ಇಂಡಿಯಾದ ನಾಯಕರಾಗಿದ್ದರು. ಈಗ ಈ ಗುಂಪಿಗೆ ರಾಹುಲ್ ಸೇರ್ಪಡೆಗೊಂಡಿದ್ದಾರೆ.

ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ದಕ್ಷಿಣ ಆಫ್ರಿಕಾದ ಘಟಾನುಘಟಿ ಬ್ಯಾಟರ್ ಗಳನ್ನು ತಮ್ಮ ವೇಗದ ಅಸ್ತ್ರದ ಪ್ರಯೋಗದಿಂದ ಕಟ್ಟಿಹಾಕುವಲ್ಲಿ ಯಶಸ್ಸು ಕಂಡ ಯುವ ವೇಗಿಗಳಾದ ಅರ್ಷದೀಪ್ ಸಿಂಗ್ (5 ವಿಕೆಟ್) ಹಾಗೂ ಆವೇಶ್ ಖಾನ್ (4 ವಿಕೆಟ್) ಎದುರಾಳಿ ತಂಡವನ್ನು 116 ರನ್ ಗಳಿಗೆ ನಿಯಂತ್ರಿಸಿದರು. ಟ್ವೆಂಟಿ-20 ಸರಣಿಯ ಕೊನೆಯ ಪಂದ್ಯವು ಇದೇ ಮೈದಾನದಲ್ಲಿ ನಡೆದಿದ್ದು ಅಲ್ಲಿ ಸ್ಪಿನ್ನರ್ ಗಳಾದ ಕುಲ್ದೀಪ್ ಯಾದವ್ (5 ವಿಕೆಟ್) ಹಾಗೂ ರವೀಂದ್ರ ಜಡೇಜಾ (2 ವಿಕೆಟ್) ಪಡೆದಿದ್ದರು. ಆದರೆ ರಾಹುಲ್, ಸ್ಪಿನ್ ಅಸ್ತ್ರದ ಬದಲಿಗೆ ವೇಗಿಗಳನ್ನು ನೆಚ್ಚಿಕೊಂಡು ಯಶಸ್ಸು ಕಂಡರು.

ಟೀಮ್ ಇಂಡಿಯಾಗೆ 8 ವಿಕೆಟ್ ಗೆಲುವು

ದಕ್ಷಿಣ ಆಫ್ರಿಕಾ ನೀಡಿದ 117 ಸುಲಭದ ಗುರಿಯು ತಮಗೆ ಲೆಕ್ಕವೇ ಇಲ್ಲ ಎಂಬುವಂತೆ ದಕ್ಷಿಣ ಆಫ್ರಿಕಾ ಬೌಲರ್ ಗಳ ವಿರುದ್ಧ ಪೈಪೋಟಿಗೆ ಬಿದ್ದಂತೆ ಬ್ಯಾಟ್ ಬೀಸಿದ ಶ್ರೇಯಸ್ ಅಯ್ಯರ್ (52 ರನ್) ಹಾಗೂ ಸಾಯ್ ಸುದರ್ಶನ್ (55* ರನ್) 16.4 ಓವರ್ ಗಳಲ್ಲೇ ತಂಡಕ್ಕೆ 8 ವಿಕೆಟ್ ಗಳ ಭರ್ಜರಿ ಗೆಲುವು ತಂದುಕೊಟ್ಟರು. ಕಳೆದ ಬಾರಿ ದಕ್ಷಿಣ ಆಫ್ರಿಕಾ ಸರಣಿಯಲ್ಲಿ ತಮ್ಮ ನಾಯಕತ್ವದಲ್ಲಿ 3-0 ರಿಂದ ಸರಣಿ ಸೋತಿದ್ದ ಕೆ.ಎಲ್.ರಾಹುಲ್ ಗೆ ಈ ಗೆಲುವಿನೊಂದಿಗೆ ಈ ಬಾರಿ ಸರಣಿ ಜಯಿಸುವ ವಿಶ್ವಾಸ ಮೂಡಿದೆ.

ಸತತ 10 ಗೆಲುವು

ದಕ್ಷಿಣ ಆಫ್ರಿಕಾ ವಿರುದ್ಧ 8 ವಿಕೆಟ್ ಗೆಲುವಿನ ನಂತರ ಕೆ.ಎಲ್.ರಾಹುಲ್ ಅಂತಾರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ತಮ್ಮ ನಾಯಕತ್ವದಲ್ಲಿ ಸತತ 10 ಗೆಲುವು ಸಾಧಿಸಿ ಕೂಲ್ ಕ್ಯಾಪ್ಟನ್ ಮಹೇಂದ್ರ ಸಿಂಗ್ ಧೋನಿ ಹೆಸರಿನಲ್ಲಿದ್ದ ಕ್ಯಾಪ್ಟನ್ಸಿ ದಾಖಲೆ ಮುರಿದರು.

ಟೀಮ್ ಇಂಡಿಯಾಗೆ ಸತತ ಗೆಲುವು ದಕ್ಕಿಸಿಕೊಟ್ಟ ಕ್ಯಾಪ್ಟನ್ಸ್

* 19 ಪಂದ್ಯ – ರೋಹಿತ್ ಶರ್ಮಾ (2019/2022)
* 12 ಪಂದ್ಯ – ರೋಹಿತ್ ಶರ್ಮಾ (2018)
* 12 ಪಂದ್ಯ – ವಿರಾಟ್ ಕೊಹ್ಲಿ (2017)
* 10 ಪಂದ್ಯ – ರೋಹಿತ್ ಶರ್ಮಾ (2023)
* 10 ಪಂದ್ಯ – ಕೆ.ಎಲ್.ರಾಹುಲ್ (2023)
* 09 ಪಂದ್ಯ – ಎಂಎಸ್‌ ಧೋನಿ (2013)