ಹಾವೇರಿ ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆಗೆ ತಟ್ಟದ ಮಳೆ ಅಭಾವ, ಬರದ ಬಿಸಿ!

ಆರಂಭದಲ್ಲಿ ಮೆಣಸಿನಕಾಯಿ ಬೆಳೆಯ ಮೇಲೆ ಪರಿಣಾಮ ಬೀರಿತ್ತು. ಆದರೆ ಕ್ರಮೇಣ ಬೆಳೆ ಸುಧಾರಿಸಿಕೊಂಡಿತು. ಇದರಿಂದ ವಾರದಿಂದ ವಾರಕ್ಕೆ ಮೆಣಸಿನಕಾಯಿ ಆವಕ ಅಧಿಕವಾಗುತ್ತಿದೆ. ಪರಿಣಾಮ ಮೆಣಸಿನಕಾಯಿ ಬೆಲೆ ಇಳಿಕೆಯಾಗುತ್ತಿದೆ. ಪ್ರಸ್ತುತ ಗುರುವಾರದ ಮಾರುಕಟ್ಟೆಗೆ ಸುಮಾರು 93 ಸಾವಿರ ಚೀಲ ಮೆಣಸಿನಕಾಯಿ ಆವಕವಾಗಿದೆ. ಇದರಿಂದ ವಾರದಿಂದ ವಾರಕ್ಕೆ ಇದು ಏರಿಕೆಯಾಗಿ ಸಂಕ್ರಾಂತಿ ನಂತರ ಮಾರುಕಟ್ಟೆ ಸ್ಟೇಬಲ್ ಆಗುತ್ತದೆ. ಮಾರುಕಟ್ಟೆಗೆ ಬಂದ 93 ಸಾವಿರ ಮೆಣಸಿನಕಾಯಿಯಲ್ಲಿ ಬ್ಯಾಡಗಿ ಡಬ್ಬಿ ತಳಿ ಸುಮಾರು 20 ಸಾವಿರ ಚೀಲ ಬಂದಿದೆ. ಸಂಕ್ರಾಂತಿ ನಂತರ ಮೆಣಸಿನಕಾಯಿ ದರ ಸಹ ಸ್ಥಿರವಾಗಲಿದೆ ಎಂದು ಸುರೇಶಗೌಡ ತಿಳಿಸಿದರು.

ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದರೆ ಬ್ಯಾಡಗಿ ಡಬ್ಬಿ ಮೆಣಸಿನಕಾಯಿಗೆ ಕ್ವಿಂಟಲ್‌ಗೆ 15 ಸಾವಿರ ಕಡಿಮೆಯಾದರೆ ಬೇರೆ ತಳಿಯ ಮೆಣಸಿನಕಾಯಿ ದರದಲ್ಲಿ ಕ್ವಿಂಟಲ್‌ಗೆ 7 ಸಾವಿರ ಕಡಿಮೆಯಾಗಿದೆ. ಸಂಕ್ರಾಂತಿ ನಂತರ ಮಾರುಕಟ್ಟೆಗೆ ಸುಮಾರು ಎರಡೂವರೆ ಲಕ್ಷದಿಂದ ಮೂರು ಲಕ್ಷ ಚೀಲದವರೆಗೆ ಆವಕವಾಗುವ ಸಾಧ್ಯತೆ ಇದೆ ಎಂದು ಸುರೇಶಗೌಡ ತಿಳಿಸಿದರು.

ಇನ್ನು ಮಾರುಕಟ್ಟೆಗೆ ಗುಜರಾತ್‌ನ ಗೊಂಡಾಲ ತಳಿಯ ಮೆಣಸಿನಕಾಯಿ ರಾಜ್ಯದಲ್ಲಿ ಬೆಳೆಯುವ 2043 ತಳಿಗೆ ಹೋಲಿಕೆಯಾಗುತ್ತಿರುವ ಕಾರಣ ಬ್ಯಾಡಗಿ ಮೆಣಸಿನಕಾಯಿ ದರ ಇಳಿಕೆಯಾಗಿದೆ ಎನ್ನುತ್ತಾರೆ ವರ್ತಕ ರಾಜು ಮೋರಗೇರಿ. ಇದರಿಂದ ಬ್ಯಾಡಗಿ ಮೆಣಸಿನಕಾಯಿ ದರ 50 ಸಾವಿರದಿಂದ 30 ಸಾವಿರಕ್ಕೆ ಕುಸಿದರೆ ಗೊಂಡಾಲ ತಳಿಯ ಮೆಣಸಿನಕಾಯಿ ದರ ಕ್ವಿಂಟಲ್‌ಗೆ 20 ಸಾವಿರಕ್ಕೆ ಕುಸಿದಿದೆ. ಹೋಟೆಲ್ ಉದ್ಯಮಿಗಳು ಮಧ್ಯವರ್ತಿಗಳು ಇದನ್ನೆ ಹೆಚ್ಚು ಅವಲಂಬಿಸಿದ್ದರಿಂದ ಮೆಣಸಿನಕಾಯಿ ದರ ಕುಸಿದಿದೆ.

ಸಂಕ್ರಾಂತಿ ನಂತರ ಬಳ್ಳಾರಿ,ಗುಲ್ಬರ್ಗಾ,ರಾಯಚೂರು ಆದೋನಿ ಮಂತ್ರಾಲಯ ಮತ್ತು ಯಮ್ಮಿಗೆನೂರು ಭಾಗಗಳಿಂದ ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆಗೆ ಬರುತ್ತಿದೆ. ಆ ಸಂದರ್ಭದಲ್ಲಿ ಬೆಲೆ ಕುಸಿಯದೇ ಈಗ ಇರುವ ದರ ಇದ್ದರೆ ಸಾಕು ಅದೇ ನಮಗೆ ಸ್ವಲ್ಪ ನೆಮ್ಮದಿ ತರಲಿದೆ ಎಂದು ವರ್ತಕ ರಾಜು ಮೋರಗೇರಿ ತಿಳಿಸಿದರು. ರೈತರು ಸಾಕಷ್ಟು ತೊಂದರೆಯಲ್ಲಿದ್ದಾರೆ. ದರ ಇನ್ನು ಕುಸಿದರೆ ರೈತರಿಗೆ ಸಹ ಬೆಳೆದ ಬೆಳೆಗೆ ಸಮರ್ಪಕ ಆದಾಯ ಸಿಗದಂತಾಗುತ್ತದೆ ಎಂಬ ಆತಂಕವನ್ನ ರಾಜು ವ್ಯಕ್ತಪಡಿಸಿದರು.

ಪ್ರಸ್ತುತ ವರ್ಷ ಮಳೆ ಕಡಿಮೆಯಾಗಿದ್ದರಿಂದ ಕೆಲ ಮೆಣಸಿನಕಾಯಿ ಬೆಳೆಗಾರರು ದುಡ್ಡು ಕೊಟ್ಟು ಟ್ಯಾಂಕರ್ ಮೂಲಕ ನೀರು ತಂದು ಬೆಳೆಗಳಿಗೆ ಹಾಕಿದ್ದಾರೆ. ಕಳೆದ ವರ್ಷ ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆಯಲ್ಲಿ ಎರಡು ಸಾವಿರ ಕೋಟಿ ರೂಪಾಯಿ ವಹಿವಾಟು ನಡೆದಿತ್ತು. ಈ ವರ್ಷ ಅದಕ್ಕಿಂತ ಹೆಚ್ಚು ವಹಿವಾಟು ನಡೆಯುವ ಸಾಧ್ಯತೆ ಇದೆ ಎಂದು ವರ್ತಕ ರಾಜು ತಿಳಿಸಿದ್ದಾರೆ. ಕಳೆದ ವರ್ಷ ರೈತರಿಗೆ ಖರೀದಿದಾರರಿಗೆ ಸ್ವಲ್ಪಮಟ್ಟಿನ ನಷ್ಟವಾಗಿತ್ತು. ಆದರೆ ಈ ವರ್ಷ ನಷ್ಟವಾಗುವ ಸಾಧ್ಯತೆ ಕಡಿಮೆ ಇದೆ. ಸದ್ಯ ಇದ್ದ ದರ ಸಿಕ್ಕರೆ ಸಾಕು ಎಂದು ವರ್ತಕ ರಾಜು ಮೋರಗೇರಿ ಅಭಿಪ್ರಾಯಪಟ್ಟಿದ್ದಾರೆ.