ಅಸೆಂಬ್ಲಿ ಎಕ್ಸಿಟ್ ಪೋಲ್ ಸುಳ್ಳಾಗಿತ್ತು, ಡಿಕೆಶಿ : ಇಲ್ಲ ಇಲ್ಲಾ.. 3 ಸಮೀಕ್ಷೆ ಕಾಂಗ್ರೆಸ್‌ಗೆ ಗೆಲುವು ಎಂದಿತ್ತು

ಹೈಲೈಟ್ಸ್‌:

ಅಸೆಂಬ್ಲಿ ಚುನಾವಣೆಯಲ್ಲಿ ನನ್ನ ಭವಿಷ್ಯವೇ ನಿಜವಾಗಿತ್ತು, ಡಿ ಕೆ ಶಿವಕುಮಾರ್
5 ಸಾವಿರದಷ್ಟು ಜನರ ಅಭಿಪ್ರಾಯ ಮಾತ್ರ ಸಂಗ್ರಹ ಮಾಡಿರುತ್ತವೆ, ಸಮೀಕ್ಷೆಗಳ ಮೇಲೆ ನಂಬಿಕೆಯಿಲ್ಲ
ಮೂರು ವಾಹಿನಿಗಳು ಕಾಂಗ್ರೆಸ್ ಅಧಿಕಾರಕ್ಕೆ ಬರುತ್ತದೆ ಎಂದು ಹೇಳಿದ್ದವು

ಬೆಂಗಳೂರು : ಕೊನೆಯ ಹಂತದ ಚುನಾವಣೆ ಮುಗಿದ ಬೆನ್ನಲೇ ಬಹುನಿರೀಕ್ಷಿತ ಚುನಾವಣೋತ್ತರ ಸಮೀಕ್ಷೆ ಹೊರಬಿದ್ದಿದೆ. ಸಮೀಕ್ಷೆ ನಡೆಸಿದ ಎಲ್ಲಾ ವಾಹಿನಿ/ಸಂಸ್ಥೆಗಳ ನಂಬರ್ ನಲ್ಲಿ ವ್ಯತ್ಯಯವಿದ್ದರೂ, ಬಿಜೆಪಿ ಮೈತ್ರಿಕೂಟಕ್ಕೆಗೆ ಪಟ್ಟ ಕಟ್ಟಿವೆ. ವಿಪಕ್ಷಗಳು, ಸ್ವಾಭಾವಿಕವಾಗಿ ಈ ಎಕ್ಸಿಟ್ ಪೋಲ್ ಮೇಲೆ ನಂಬಿಕೆಯಿಲ್ಲ ಎಂದಿವೆ.

” ಕರ್ನಾಟಕ ವಿಧಾನಸಭಾ ಚುನಾವಣೆ ವೇಳೆ ಕಾಂಗ್ರೆಸ್ ಅಧಿಕಾರಕ್ಕೆ ಬರುವುದಿಲ್ಲ ಎಂದು ಭವಿಷ್ಯ ನುಡಿದಿದ್ದ ಸಮೀಕ್ಷೆ ಸುಳ್ಳಾಯಿತು. ಆ ಚುನಾವಣೆಯಲ್ಲಿ ನನ್ನ ಭವಿಷ್ಯವೇ ನಿಜವಾಗಿತ್ತು” ಎಂದು ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅಭಿಪ್ರಾಯ ಪಟ್ಟಿದ್ದಾರೆ. ಕಳೆದ ಕರ್ನಾಟಕ ಅಸೆಂಬ್ಲಿ ಚುನಾವಣೆಯಲ್ಲಿ ಕಾಂಗ್ರೆಸ್ 136 ಸ್ಥಾನ ಗೆಲ್ಲುತ್ತದೆ ಎಂದು ಡಿಕೆಶಿ ಹೇಳಿದ್ದರು. ಅದರಂತೆಯೇ, ಕಾಂಗ್ರೆಸ್ 135 ಸ್ಥಾನವನ್ನು ಗೆದ್ದಿತ್ತು.

ಐದು ಸಾವಿರದಷ್ಟು ಜನರ ಸ್ಯಾಂಪಲ್ ಅಭಿಪ್ರಾಯ ತೆಗೆದುಕೊಂಡು ಮಾಡಲಾಗುವ ಸರ್ವೇ ಇದು ಎಂದು ಡಿಕೆಶಿ ಹೇಳಿದ್ದಾರೆ. ಅವರು ಹೇಳಿದಂತೆಯೇ, ಬಹುತೇಕ ಸರ್ವೇಗಳು ಸುಳ್ಳಾಗಿದ್ದರೂ, ಮೂರು ವಾಹಿನಿಗಳು ಕಾಂಗ್ರೆಸ್ ಮತ್ತೆ ಅಧಿಕಾರಕ್ಕೆ ಬರುತ್ತದೆ ಎಂದು ಹೇಳಿದ್ದವು.

ಅದರಲ್ಲೂ ಒಂದು ವಾಹಿನಿಯಂತೂ, ಕಾಂಗ್ರೆಸ್ ಗೆದ್ದ ಒಟ್ಟು ಸೀಟಿನ ರೇಂಜ್ ನಲ್ಲೇ ತನ್ನ ಎಕ್ಸಿಟ್ ಪೋಲ್ ನಲ್ಲಿ ಉಲ್ಲೇಖಿಸಿತ್ತು ಎನ್ನುವುದು ಗಮನಿಸಬೇಕಾದ ವಿಚಾರ. ಇಂಡಿಯಾ ಟುಡೇ – ಏಕ್ಸಿಸ್ ಮೈ ಇಂಡಿಯಾ ಸರಿಯಾದ ಭವಿಷ್ಯವನ್ನು ತನ್ನ ಕರ್ನಾಟಕ ಚುನಾವಣೆಯ ಎಕ್ಸಿಟ್ ಪೋಲ್ ನಲ್ಲಿ ನೀಡಿತ್ತು.

ಕಳೆದ ಅಸೆಂಬ್ಲಿ ಚುನಾವಣೆಯಲ್ಲಿ ಸುಮಾರು ಹತ್ತು ಮಾಧ್ಯಮಗಳು/ಸಂಸ್ಥೆಗಳು ಮತಗಟ್ಟೆ ಸಮೀಕ್ಷೆ ನಡೆಸಿದ್ದವು. ಅದರಲ್ಲಿ ನ್ಯೂಸ್ ನೇಶನ್ – ಸಿಜಿಎಸ್, ಬಿಜೆಪಿ ಅಧಿಕಾರ ಉಳಿಸಿಕೊಳ್ಳಲಿದೆ ಎಂದು ಹೇಳಿತ್ತು. 5 ವಾಹಿನಿಗಳು ಮತ್ತು ಪೋಲ್ ಆಫ್ ಪೋಲ್ ಅತಂತ್ರ ಫಲಿತಾಂಶದ ಸಮೀಕ್ಷಾ ವರದಿಯನ್ನು ನೀಡಿತ್ತು.

ಅತಂತ್ರ ಫಲಿತಾಂಶದ ಸಮೀಕ್ಷಾ ವರದಿಯನ್ನು ನೀಡಿದ್ದ ವಾಹಿನಿಗಳು:
1. ಎಬಿಪಿ ನ್ಯೂಸ್ – ಸಿ ವೋಟರ್ : ಕಾಂಗ್ರೆಸ್ – 100 ರಿಂದ 112, ಬಿಜೆಪಿ – 83 ರಿಂದ 95, ಜೆಡಿಎಸ್ 21 ರಿಂದ 29, ಇತರರು 2 ರಿಂದ 6
2. ರಿಪಬ್ಲಿಕ್ ಟಿವಿ – ಪಿ ಮಾರ್ಕ್ : ಕಾಂಗ್ರೆಸ್ – 94 ರಿಂದ 108, ಬಿಜೆಪಿ – 85 ರಿಂದ 100, ಜೆಡಿಎಸ್ 24 ರಿಂದ 32, ಇತರರು 2 ರಿಂದ 6
3. ಸುವರ್ಣ ನ್ಯೂಸ್ – ಜನ್ ಕೀ ಬಾತ್ : ಕಾಂಗ್ರೆಸ್ – 91 ರಿಂದ 106, ಬಿಜೆಪಿ – 94 ರಿಂದ 117, ಜೆಡಿಎಸ್ 14 ರಿಂದ 24, ಇತರರು 0 ರಿಂದ 2
4. ಟಿವಿ9 ಭಾರತವರ್ಷ್ – ಪೋಲ್‌ಸ್ಟಾರ್ಟ್‌ : ಕಾಂಗ್ರೆಸ್ – 99 ರಿಂದ 109, ಬಿಜೆಪಿ – 88 ರಿಂದ 98, ಜೆಡಿಎಸ್ 21 ರಿಂದ 26, ಇತರರು 0 ರಿಂದ 4
5. ಜೀನ್ಯೂಸ್ – ಮ್ಯಾಟ್ರಿಜ್ : ಕಾಂಗ್ರೆಸ್ – 103 ರಿಂದ 118, ಬಿಜೆಪಿ – 79 ರಿಂದ 94, ಜೆಡಿಎಸ್ 25 ರಿಂದ 33, ಇತರರು 2 ರಿಂದ 5
ಪೋಲ್ ಆಫ್ ಪೋಲ್ : ಕಾಂಗ್ರೆಸ್ – 109, ಬಿಜೆಪಿ – 91, ಜೆಡಿಎಸ್ 22, ಇತರರು 2

ಕಾಂಗ್ರೆಸ್ ಅಧಿಕಾರಕ್ಕೆ ಬರುತ್ತೆ ಎಂದಿದ್ದ ವಾಹಿನಿಗಳು:
1. ಇಂಡಿಯಾ ಟುಡೇ – ಏಕ್ಸಿಸ್ ಮೈ ಇಂಡಿಯಾ : ಕಾಂಗ್ರೆಸ್ – 122 ರಿಂದ 140, ಬಿಜೆಪಿ – 62 ರಿಂದ 80, ಜೆಡಿಎಸ್ 20 ರಿಂದ 25, ಇತರರು 0 ರಿಂದ 3
2. ಇಂಡಿಯಾ ಟಿವಿ – ಸಿಎನ್ಎಕ್ಸ್ : ಕಾಂಗ್ರೆಸ್ – 110 ರಿಂದ 120, ಬಿಜೆಪಿ – 80 ರಿಂದ 90, ಜೆಡಿಎಸ್ 20 ರಿಂದ 24, ಇತರರು 1 ರಿಂದ 3
3. ನ್ಯೂಸ್ 24 – ಟುಡೇಸ್ ಚಾಣಕ್ಯ : ಕಾಂಗ್ರೆಸ್ – 120, ಬಿಜೆಪಿ – 92, ಜೆಡಿಎಸ್ 12, ಇತರರು 0

ಇಂಡಿಯಾ ಟುಡೇ – ಏಕ್ಸಿಸ್ ಮೈ ಇಂಡಿಯಾ ವಾಹಿನಿಯ, ಕಾಂಗ್ರೆಸ್ ಮತ್ತೆ ಅಧಿಕಾರಕ್ಕೆ ಬರುತ್ತದೆ ಎಂದು ನುಡಿಯಲಾಗಿದ್ದ ಸಮೀಕ್ಷೆಯು ಕರಾರುವಕ್ಕಾಗಿತ್ತು. ಇದೇ ವಾಹಿನಿಯು, ಹಾಲೀ ಲೋಕಸಭಾ ಚುನಾವಣೆಯಲ್ಲಿ, ಎನ್‌ಡಿಎ ಮೈತ್ರಿಕೂಟಕ್ಕೆ 361- 401, ಇಂಡಿಯಾ ಮೈತ್ರಿಕೂಟಕ್ಕೆ 131 ರಿಂದ 166 ಸ್ಥಾನ ಎಂದು ತನ್ನ ಎಕ್ಸಿಟ್ ಪೋಲ್ ನಲ್ಲಿ ಹೇಳಿದೆ.